Элга хизмат – олий ҳиммат

Гап ёшда эмас, бошда дейдилар. Ёш бўлса-да кўпчиликка бош бўлиб, бутун куч-ғайрати, бор билим ва тажрибасини ишга солиб эл-юрт хизматига камарбаста бўлиб келаётган ёшлар билан суҳбатлашсангиз, мазза қиласиз. Беихтиёр: Э қойил, баракалла, умрингдан барака топ, болам, отангга рахмат, – деб юборасиз. Фахрланасиз. Ахир, шундай ақлли, зукко, ишбилармон, хушфеьл ва хушмуомалали ёшлар билан фахрланмай бўладими?!

Биз яқинда хизмат сафари билан Фарғона вилоятининг Қува туманида бўлганимизда ана шундай ёшлардан бири – “Фарғона ҳудудгаз” МЧЖга қарашли Қува газ тўлдириш шахобчаси бошлиғи Шоҳрухбек Абдумуталов билан танишдик. Айтиш жоизки, Шоҳрухбек 29-30 ёшлардаги очиқ юзли, бир сўзли, қатъий тартиб-интизомни хуш кўрувчи, қўл остидаги барча ишчи-ходимларни беш қўлдай яхши биладиган ва уларнинг ҳурматини жойига қўядиган, энг муҳими, эл-юрт розилиги ва халқ манфаатини ҳамма нарсадан устун қўядиган мард ва ўктам йигит экан. Суҳбатимиз қисқа, аммо мароқли кечди.

Қува газ тўлдириш шахобчасининг 15 кишидан иборат аҳил жамоамиз Қува,Тошлоқ, Қувасой, Сўх туманлари ва Фарғона шаҳар аҳолисига хизмат қилади, – дейди Шохрухбек Абдумуталов. – Ҳар бир ходим ўз ишининг устаси ҳисобланади. Ҳисобга олиш техниги Маъмуржон Ортиқов, газ тўлдирувчи Сардор Ғуломов, техника хавфсизлиги бўйича етакчи муҳандис Шоҳрухбек Мухторов ва бошқа ишчи-ходимларнинг ҳам хизматидан барча мамнун.

Олдимизда уч ой қиш. Қорли, қировли, изғиринли кунлар турибди. Мавсумга тайёрмисизлар? – деб сўрадик бошлиқдан.

– “Қиш ғамини ёзда е” деган нақл бор, – дейди Шоҳрухбек. Қиш мавсумига ҳар томонлама пухта ҳозирлик кўрилган. Қорли, қировли кунлар ишга янада юксак масъулият билан ёндашишни, яъни туман ва шаҳар газ идоралари орқали махсус автомашиналарда бизга етиб келган бўш газ баллонлар ўрнига тўлдирилган газ баллонларни пешма-пеш ортиб, энг чекка ҳудудларгача ўз вақтида етказиб беришни талаб қилади.

Газ идоралари раҳбар-ходимлари бу ҳақда нима деркан? Газ баллон ташувчи махсус автомашиналар мавсумга шайми?

– Мен шу соҳада 15 йилдан буён ишлайман, – дейди ўзини Миродил деб таништирган Қува тумани газ идораси суюлтирилган газ бўлими етакчи мутахассиси. Туманимизда 57 та маҳалла бор. Ҳар бир маҳалла аҳли маҳаллага қачон газ келишини биздан яхши билади. Маҳаллаларга 6 та махсус газ баллон ташувчи автотранспорт воситалари орқали тўлдирилган газ баллонлари етказиб берилмоқда. Автотранспорт воситаларининг барчаси қиш мавсумига шай. Нўъмонжон Аҳмадқулов, Улуғбек Жўраев, Элёр Тўланов каби шофёрларимиздан аҳоли мамнун.

Ҳа, эл-юртга чин дилдан хизмат қилиб, кўпчиликнинг дуосини олишга нима етсин!

Қурбон АЛИ,
ўз мухбиримиз

Таҳлилий мақолалар

Admin. Жойлаштирган санаси: 26-11-2020, 13:52

Асосий сахифа » Таҳлилий мақолалар » Элга хизмат – олий ҳиммат

Сайтга кириш