“Ватан ҳимоячиси бўламан!” болажонлар иштирокидаги тадбир қизиқарли ўтди

Пойтахтимизнинг Яшнобод туманидаги 147-давлат мактабгача таълим ташкилотида 14 январь – Ватан ҳимоячилари кунига бағишлаб ажойиб тадбир ўтказилди.
“Қуёшча” номли мактабга тайёрлов гуруҳи тарбияланувчилари иштирокида ташкил этилган “Ватан ҳимоячиси бўламан!” тадбирига Халқаро аэропортларда хавфсизликни таъминлаш қўшинлари 7251-сонли ҳарбий қисмдан бир гуруҳ аскарлар ташриф буюрди.
Байрамона безатилган залга болажонлар “Марш” мусиқаси остида кириб келдилар.
Тарбиячи Орзигул Юлдашева кечани очар экан, юртимиз осойишталигини қўриқлаб турган ватан ҳимоячиларини қутлуғ айём билан табриклади.

Бир кун катта бўламиз,
Ўн еттига тўламиз.
Мустақил она юртга,
Комил фарзанд бўламиз.

Биз ҳозирча боламиз,
Боғдаги гул лоламиз
Тинчликсевар ҳалқимнинг,
Мард жасур ўғлонимиз.

Бир кун катта бўламиз,
Худди ойдек тўламиз.
Она юрт тупроғини,
Ҳеч ҳам ёвга бермаймиз!
Болажонлардан Азизбек Наимқулов, Зиёвиддин Абдужабборов, Достон Русланов ушбу шеърни ўқишганида тадбир меҳмонлари гулдурос қарсаклар билан олқишладилар.

Орзигул опа болажонларнинг ҳарбийликка оид билимларини синаб кўриш мақсадида “Аскар – ким?” ўйинини уюштирди.
– Юртимизни кимлар қўриқлайдилар?
Малика Беркинова: – Аскарларимиз!
– Аскар қандай бўлиши керак?
Жаҳонгир Муҳаммадиев: – Аскар – қўрқмас, ботир, бақувват, жасур ва эпчил!
Солиҳа Сулаймонова: – Аскар – ўз Ватанини севиши керак!
Фирдавс Маткаримов: – Аскар – ҳарбий билимга эга бўлиш керак!
Салимжонова Фарзона:– Аскар – ҳарбий техника ва қуроллардан фойдалана олиши керак!
Фарангиз Мардонқулова: – Аскар – Ватанимизни душманлардан қўриқлаши керак!
– Аскарлар қандай техникалардан фойдаланади?
Шоҳруз Мамасолиев: – Ракета, самолёт, вертолёт, танк, юк машиналари...
– Ҳарбий унвонлардан қайсиларини биласиз?
Азизбек Наимқулов: – Оддий аскар, киччик сержант, сержант, катта сержант, лейтенант, катта лейтенант, капитан, мойор, подполковник, полковник, генерал майор, генерал летейнант, генерал полковник.
Болажонлар барча саволларга бийрон жавоб бериши баробарида Миллий армиямиз ташкил топганига 28 йил тўлганини, Президентимиз – Бош қўмондимиз эканлигини айтишди. Миллий армиямизни ривожлантиришда буюк саркарда Амир Темур бобомизнинг “Темур тузуклари” асарида армияни қандай шакллантириш қонун-қоидалари ҳақидаги ўгитларидан фойдаланганини ҳам билишаркан.
Тарбияланувчилар ижросидаги ватанпарварлик руҳида куй ва қўшиқлар барчага бирдек манзур бўлди. Тадбир сўнгида гуруҳ ўғлонлари “Темурбеклар” тўгараги қасамёдини ёд олишди.

Ҳафиза Ҳамдамова раҳбарлигидаги Орзигул Юлдашева, Даврон Умаров ҳамда Барно Хўжанова каби таълим муассасаси фаоллари ташкиллаштирган байрам тадбири болажонлар қалбида узоқ йиллар муҳрланиб қолиши, шубҳасиз!

Гулбаҳор ИСМАИЛОВА,
Низомий номидаги ТДПУ талабаси

Тадбирлар

Admin. Жойлаштирган санаси: 14-01-2021, 11:28

Асосий сахифа » Тадбирлар » “Ватан ҳимоячиси бўламан!” болажонлар иштирокидаги тадбир қизиқарли ўтди

Сайтга кириш