АЗИЗБЕКНИНГ САХОВАТИ

Китоб туманидаги “Чармгар” маҳалла фуқаролар йиғинида истиқомат қилаётган Афғон уруши қатнашчиси Шавкат Норқобилов 3 сотихлик иссиқхонада яхши ниятлар билан ўтқазган лимон дарахтлари ҳосил бера бошлади. 11 ёшга қадам қўйган набираси Азизбек Сирожев лимон дарахтларини парваришлашда бобосининг дастёрига айланган. Иссиқхонадаги шиғил-шиғил ҳосил қилган лимонларга завқланиб боқар экан, бобосидан кўнглидагини яширмади.

“Сирожев Азизбек лимонзорлари” деҳқон хўжалигида етиштирилган илк ҳосил Китоб туманидаги 5-Меҳрибонлик уйи тарбияланувчиларига улашилмоқда.

-Бобожон, биринчи ҳосилни меҳрибонлик уйида тарбияланаётган тенгдошларимга совға қилсак майлими?
-Азизбек, менинг кўнглимдагини гапирдинг-да. Биринчи ҳосилни бугуноқ меҳрибонлик уйига олиб борамиз.
-Қандай яхши. Унда мен ҳосил узишга киришаман. Қани бошладик...
Дарвоқе, саховатнинг катта-кичиги бўлмайди. Бир ўксик кўнгилни овламоқ-минг марта Маккага зиёрат қилиш билан баробар. Бу ҳақ гап. Тумандаги рус тилига ихтисослаштирилган 2-мактабнинг 5 “д” синфида таҳсил олаётган Азизбек бобоси билан лимонларни теришга киришди.

Гап-сўзлари бурро, фикр доираси кенг бўлган Азизбек ёш бўлса-да, барча ишларда бобосининг яқин кўмакчисига айланган. У рус тилида эркин сўзлаша олади. Бобо-набира терилган лимонларни яшикларга жойлар экан, тезроқ меҳрибонлик уйида тарбияланаётган болалар ҳузурига бориб, тенгдошларининг кўнглини олишга шошилди.
-Айни пайтда бу ерда 7 ёшдан 18 ёшгача бўлган 76 нафар болалар тарбияланмоқда,-дейди 5-меҳрибонлик уйи директори Олимжон Бойқобилов. -Азизбекнинг болаларга инъоми кутилмаган совға бўлди. Жамоамизнинг барча аъзолари номидан уларга миннатдорчилик билдирамиз.

Шу куни бобо-набира иссиқхонада ўзлари етиштирган 20 килограммдан ортиқ лимонни меҳрибонлик уйи тарбияланувчиларига совға қилишди. Бу ерда 12 та тўгарак фаолият кўрсатиб турибди. Тумандаги ҳамкор ташкилот вакиллари болаларни касб-ҳунарга ўргатишда яқиндан кўмаклашмоқдалар. Кичкина Азизбек бўш пайтларда “Сирожев Азизбек лимонзорлари” деҳқон хўжалигида бобоси билан ишлаб, дастурхон тўкинлигини таъминлаётган энг ёш замондошларимиздан бири.

Шавкат СУЛТОНОВ

"Фаровон юрт" газетаси

Admin. Жойлаштирган санаси: 15-12-2020, 07:51

Асосий сахифа » "Фаровон юрт" газетаси » АЗИЗБЕКНИНГ САХОВАТИ

Сайтга кириш